Павлодар облысындағы ерекше көлді халық ластай бастаған
Су жағасы пластик бөтелкелерге толған
Ертіс өңірінің жастары Коряковка көлінің маңайын күл-қоқыстан тазартты деп хабарлады «Хабар-24». Тұздыкөл облыс орталығынан 18 шақырымда жатыр. Бұл көлдің түсі желдің бағытына орай құбылып тұрады. Әсіресе қызғылт түске боялған кейпін тамашалауға келетіндер өте көп.
Көлдің суы таяз болғандықтан ол жерде ешкім шомылмайды. Соған қарамастан маңайы пластик құтылар мен басқа да тұрмыстық қалдыққа толып кеткен. Осылай жалғаса берсе экологиялық апатқа ұшырауы әбден мүмкін. Волонтерлер мен «Жасыл Ел» жастардың еңбек жасағының мүшелері осылай деді. Олар «Taza Pavlodar» экологиялық акциясы шеңберінде Ертіс жағалауын, Усолка өзенінің бойын, Құсқонақ өткелін тазартумен айналысады.
Коряковка көлінде шамамен екі ғасыр бұрын тұз өндірісі дамыған. Өнімді тасымалдау үшін салынған көпірдің жұрнағы әлі күнге дейін сақталыпты. Ал геологиялық барлау жұмыстары тұздың мол қорын анықтады.
