Бас мүфти онлайн құрбандық шалудың қалай жүзеге асатынын хабарлады

Қазақстан Мұсылмандарының діни басқармасы биыл құрбан шалу онлайн өтетінін хабарлады. Бүгін брифинг өткізген бас мүфти Наурызбай қажы Тағанұлы процестің ерекшеліктерін атап өтіп, толық ақпарат берді.

Бас мүфти хабарлағандай, карантин мен пандемияға байланысты, биыл құрбандық жасайтын азаматтардан онлайн-тапсырыс жиналады. Яғни, бұрынғыдай адам малды өзі таңдап, қасапшының жанында тұрып, дұға оқи алмайды және құрбандығының бір бөлігін үйіне әкете алмайды. Діни басқарма мал еті түгелдей мұқтаж жандарға таратылатынына кепіл берді.

«Құрбан шалу ұлық ғибадат әрі жағдайы келген мұсылманға  құрбан шалу уәжіп болып есептеледі. Осынау ұлы ғибадатты орындау мақсатында діни басқарма ел мұсылмандарының өтініштерін ескере отырып, биыл алғаш рет Құрбан айт қарсаңында халықаралық тәжірибеге сүйеніп, қашықтан құрбан шалу жобасын қолға алдық. Осы мақсатты жүзеге асыру үшін, Qurban2020.kz сайты ашылып, бүгіннен, яғни 24 шілдеден бастап 24 сағат бойы жұмыс істейді. 30 шілдеге дейін құрбан шалуға онлайн тапсырыс қабылданады. Кез келген азамат онлайн түрде құрбан шалуға тапсырыс бере алады. Онлайнда тапсырыс қабылдап, құрбандық етін мұқтаж жандарға тарату тәжірибесі Түркия, Малайзия, БАӘ сияқты бірқатар мұсылман елдерінде бұрыннан қалыптасқан және жыл сайынғы игі дәстүрге айналған», - дейді Бас мүфти.

Дегенмен, жаңадан ашылып жатқан сайт болғандықтан әрі қазақстандықтар үшін жаңа құбылыс саналатындықтан, Наурызбай қажы сайтта техникалық ақаулар пайда болып жатса, алдын ала кешірім сұрай отырып, халықтың түсіністік танытуын өтінді. Оның айтуынша, онлайн құрбандықтың басты ерекшелігі – ет түгелдей мұқтаж жандарға беріледі.

 «Онлайн құрбандық жүйесін ашудағы мақсат – сын сағатта пайда табу емес. Халықтың құрбан шалуға деген қажеттілігін жүзеге асыру. Діни басқарманың мақсаты – азаматтардың құрбандықтарын шалып беруді ұйымдастыру. Онлайн тапсырыс арқылы құрбандық шалу кезінде бұрынғыдай малды өзің таңдау, қасапшының қасына барып қатысу сияқты бұрыннан қалыптасқан жағдайлар болмайды. Аталмыш жоба келесі жылы да өз жалғасын табады деген үміттеміз. Онлайн құрбандық шалу барысында делдалдық қызмет жасалмайды, екі ортада жүріп, ешкім пайда таппайды. Құрбандық шалу рәсімін ұйымдастыру құрбан етін мұқтаждарға бөлу. Осы кезге дейін құрбан шалған азаматтар, құрбан етін үшке бөліп, бір бөлігіне айттық жасайтын. Пандемияға байланысты, еттің үштен бірі құрбан шалған азаматқа берілмйді, түгелдей мұқтаждарға таратылады. Карантин кезінде онлайн құрбан шалуға мемлекет тарапы көмектесті. Жергілікті жерлерде оған қажетті жағдайлар жасалды», - деп хабарлады ол.

Кенжекей Тоқтамұрат, Нұр-Cұлтан