ІІМ төтенше жағдай кезінде блок-бекеттердің пайдасы көп болды деп есептейді

ҚР Ішкі істер министірінің орынбасары Алексей Калайчиди елдегі төтенше жағдай кезінде қойылған блок-бекеттердің пайдасы көп болды деп есептейді. Azattyq Ryhy тілшісінің «Блок-бекеттердің тұрғанына қарамастан ауру өршіп кетті. Министрлік төтенше жағдай уақытында тағы қандай қателіктерге жол берді?» деген сұрағына ол өз уәжін келтірді.

«Екі ай бойы төтенше жағдай режимі сақталды. Дәл осы қатаң карантиндік шаралар қазақстандықтарды босаңсытып жіберді. Себебі, адамдар коронавирусқа, оның қаупіне сенген жоқ. Ал, қалалар арасындағы блок-бекеттер бізге адамдардың бір жерге топтасып жиналуын шектеуге мүмкіндік берді. Сондай-ақ ол кезде денсаулық сақтау жүйесіне ешқандай жүктеме түскен жоқ. «Анда көп кісі ауырып жатыр екен, мұнда ауру тарап кетті» деген әңгімелерді сирек естідік. Яғни, екі айлық қатаң карантин біздің денсаулық сақтау жүйесіне қазір болып жатқан отырған жағдайға дайындалуға мүмкіндік берді», - деді ол брифингте.

Вице-министр төтенше жағдай режимі жағдайында ішкі істер органдарына жұмыс істеу оңайға соқпағанын, ағаттықтар болғанын мойындады.

«Бізге (ішкі істер органдары – авт.) қиын болған себебі – ел аумағында бірінші рет осындай Төтенше жағдай режимі енгізілді. Халыққа да, бізге де төтенше жағдай ережелерін қабылдау оңай соққан жоқ. Басында түсініспеушіліктер болды. Көбіне профилактикалық, түсіндіру жұмыстарымен айналыстық. Полицейлер ұстамды бола білді. Тек тәртіпке бағынбағандарға қарсы шаралар қабылдауға мәжбүр болды. Бұл – төтенше жағдай режиміне біздің ғана емес, шет елдердің де беріп отырған бағасы», - деді министрдің орынбасары.

Еске салсақ, коронавирус пандемиясына байланысты Қазақстан аумағында 16 наурыз бен 11 мамыр аралығында төтенше жағдай режимі енгізіліп, ірі қалалар арасындағы қатынас, қозғалыс шектелді. Алайда, елде індет өршіп кеткеннен кейін билік 5 шілдеден бастап 2 тамызға дейін қайтадан қатаң карантин енгізуге мәжбүр болды. Алайда, ірі қалалар арасында блок-бекеттер қойылған жоқ. Әуе, автокөлік, теміржол қозғалысы тоқтамады.

Абай Сейфулла, Нұр-Сұлтан