Алматы облысында тоғыз жаңа мектеп ашылады
Бұл нысандардың құрылысы аяқталуға жақын
Алматы облысында білім беру инфрақұрылымын дамыту мақсатында жүргізіліп жатқан «Келешек мектебі» жобасы аясында 9 нысанның құрылысы аяқталуға жақын. 2026 жылдың наурыз айының соңына дейін пайдалануға берілетін бұл мектептер өңірдегі орын тапшылығын едәуір азайтады, деп хабарлайды Azattyq Rýhy.
Үш ауысымды оқыту мәселесі қалай шешіледі?
Жаңадан салынған 9 мектептің бесеуі тікелей үш ауысымды оқытуды жоюға бағытталған. Олар келесі елді мекендерде орналасқан:
Алатау қаласы: Қоянқұс ауылы;
Іле ауданы: Тілендиев ауылы;
Қарасай ауданы: Бұланды ауылы;
Талғар ауданы: Тұздыбастау және Жалқамыс ауылдары.
Бұл жобалар іске қосылған соң облыстағы үш ауысымды мектептер саны 28-ден 23-ке дейін азаяды.
Қалған 4 мектеп орын жетіспеушілігін шешу үшін бой көтерді. Олар Еңбекшіқазақ ауданының Сатай және Ащысай ауылдарында, сондай-ақ Талғар ауданының Қызылту мен Көктал ауылдарында орналасқан.
Жаңа құрылыстардан бөлек, облыстағы 13 мектепті күрделі жөндеуге жергілікті бюджеттен қомақты қаржы бөлінді. Қазірдің өзінде екі нысан — Еңбекшіқазақ ауданындағы Масақ ауылының мектебі мен Талғар ауданы Белбұлақ ауылындағы №10 мектеп пайдалануға берілді.
Жөндеу жұмыстары жалғасып жатқан аудандар: Еңбекшіқазақ, Жамбыл, Кеген және Ұйғыр аудандары; Қарасай және Талғар аудандары; Қонаев қаласы.
Қалған 11 мектептегі жөндеу жұмыстары 2026 жылдың маусым-шілде айларында толық аяқталады деп жоспарланған
Көп оқылған
