Дәрігерлер 56 жастағы науқастың өмірі үшін 10 күн арпалысқан
Алматы Орталық қалалық клиникалық ауруханасына коронавирус инфекциясының ауыр түрімен, екіжақты пневмониямен 56 жастағы әйел түскен. Ауруханаға ауыр халде жеткізілген науқасты компьютер томографиясына түсіргенде, оның өкпесінің екі жағы 96%-ға полисегменттік зақымданғаны байқалған. Оған қоса, әйел ІІ дәрежелі артериялық гипертонияға шалдыққан. Осылайша, науқас шұғыл түрде реанимация және қарқынды терапия бөліміне ауыстырылды. Орталық қалалық клиникалық аурухананың дәрігерлері 10 күн бойы жансақтау бөлімінде жатқан науқасқа барлық қажетті медициналық көмек көрсете отырып, оның өмірі үшін күресті.
«Қазір емделуші өзін жақсы сезінеді, арнайы тексерулерден кейін учаскелік дәрігердің бақылауына жіберілді», - деді ауруханадағы бас дәрігердің міндетін атқарушы Гүлнар Құлқаева.
Ем барысында оттегі беретін аппараттар мен өзге де құрылғылар пайдаланылған. Кейін жағдайы жақсарған соң науқас байланысты бейінді бөлімге ауыстырылды. Коронавирус жұқтырып, өлім аузынан қалған әйел бүгінде ауруынан айығып, ауруханадан шығарылды.
«Дәрігерлерге, мейірбикелерге және санитарларға алғысым шексіз. Олардың маған жасаған бар еңбегі, менің өмірімді құтқарғаны, маған екінші өмір сыйлағаны үшін көп рахмет!» – деп ағынан жарылды ауруханадан шыққан әйел.
Әмірболат Құсайынұлы, Алматы