Иран президентінің ұлықтау рәсіміне Қазақстан атынан Мәулен Әшімбаев қатысқан

Иран Президенті Масуд Пезешкианды ұлықтау рәсіміне сенат төрағасы Мәулен Әшімбаев қатысты, деп хабарлайды Azattyq Rýhy.

Сенаттың баспасөз қызметі хабарлағандай, Әшімбаев Иранға президент Қасым-Жомарт Тоқаевтың тапсырмасымен барған.

Мәулен Әшімбаев Тоқаевтың атынан Иран Ислам Республикасының жаңадан сайланған Президенті Масуд Пезешкианды сайлаудағы жеңісімен құттықтады.

«Сізге Қазақстан Республикасының Президенті Қасым-Жомарт Кемелұлы Тоқаевтың құттықтауы мен жылы лебізін жеткізуге рұқсат етіңіз. Мемлекет басшысы біздің елдеріміз арасындағы екіжақты саяси және экономикалық ынтымақтастықты дамытуға ерекше көңіл бөліп отыр. Иран – Каспий өңіріндегі көршіміз, сондай-ақ, Таяу және Орталық Шығыстағы маңызды сауда серіктестеріміздің бірі. Сондықтан Иранмен қарым-қатынасты нығайту біздің сыртқы саясатымыздағы басым бағыттардың бірі болып қала береді. Бұл ретте Қазақстан Парламенті өз тарапынан елдеріміз арасындағы байланысты жан-жақты нығайтуға ықпал етеді», – деп хабарлады Мәулен Әшімбаевтің сөзін сенаттың баспасөз қызметі.

Естеріңізге сала кетейік, биыл көктемде Иранның сол кездегі президенті  Ибрахим Раиси тікұшақ апатынан қаза тапқан болатын.