Тоқаев Әзербайжан президентін сайлаудағы жеңісімен құттықтады

Қасым-Жомарт Тоқаев Ильхам Әлиевті Әзербайжан Республикасының Президенті лауазымына кезектен тыс өткен сайлаудағы айқын жеңісімен құттықтады, деп хабарлайды Azattyq Ruhy Ақордаға сілтеме жасап. 

Мемлекет басшысы сайлаудағы дауыс беру қорытындысы Ильхам Әлиевтің Әзербайжанды одан әрі нығайтуға, елдің әлеуметтік-экономикалық әл-ауқатын қамтамасыз етуге және мемлекеттің халықаралық аренадағы беделін арттыруға бағытталған стратегиялық бағдары мен ауқымды реформалары бүкілхалықтық қолдауға ие болғанын анық көрсеткенін атап өтті.

Қасым-Жомарт Тоқаев Ильхам Әлиевтің әзербайжан халқының игілігі мен дамуы үшін қолға алған барлық жоспарының табысты орындалуына тілектестік білдірді.

Өз кезегінде Әзербайжан Президенті құттықтағаны үшін Қасым-Жомарт Тоқаевқа алғыс айтып, бауырлас Қазақстанмен арадағы ғасырлар бойы қалыптасқан достық, стратегиялық серіктестік және одақтастық рухындағы ынтымақтастықты одан әрі тереңдете беруге ниетті екенін растады.

Айта кетсек, 7 ақпанда Әзербайжанда кезектен тыс президент сайлауы өткен болатын. Әзербайжан Орталық сайлау комиссиясының (ОСК) төрағасы Мазахир Панахов дауыс берудің алдын ала қорытындысын жариялады. 

Президенттікке үміткер Ильхам Әлиев 92,05% дауыспен көш бастап тұр. Қалған кандидаттар: Захид Орудж 2,19% дауыс, Рази Нұруллаев - 0,8%, Фазиль Мұстафа - 2%, Эльшад Мұсаев - 0,67%, Гудрат Гасангулиев - 1,76%, Фуад Әлиев - 0,53% дауыс жинаған. 

Елде 6 миллион 478 мың 623 адамның сайлауға қатысуға құқығы бар. Бүкіл ел бойынша 6537 сайлау учаскесі құрылды. Шетелде жүрген Әзірбайжан азаматтары үшін 37 елдің елшіліктері мен консулдықтарында 49 сайлау учаскесі құрылды.

Сайлауды бақылау үшін 90 мыңнан астам бақылаушы тіркелген.

Тәуелсіз Әзірбайжан тарихында алғаш рет сайлау елдің бүкіл аумағын қамтыды. Оккупациядан босатылған өңірлерде 26 сайлау учаскесі құрылды.