ЕО Украинаға қаржылай көмек береді
Көмек құны – 50 млрд еуро
Еуропа Одағының бүкіл 27 мемлекеті Украинаға 50 миллиард еуро көлемінде қаржылай көмек беруге келісті, деп хабарлады Azattyq Ruhy BBC-ге сілтеме жасап.
«Бұл шешім – Украинаны ұзақ уақыт бойына тұрақты түрде қаржыландыруға кепілдік береді», - деді Еуропалық Кеңестің басшысы Чарльз Мишель.
Ол Еуропа Одағының Украинаны қолдауда көшбасшылық көрсететінін және жауапкершілік алатынын атап өтті.
Қаржылай көмек 2024-2027 жылдар аралығында бірте-бірте іске аспақ. Қаражат негізінен Украинаны қайта құру және жаңғырту жұмыстарына, экономикасын қалпына келтіруге, соғыстың әлеуметтік салдарын жоюға жұмсалады.
Бұған дейін, Украинаға көмек пакетін беруге Венгрияның премьер-министрі Виктор Орбан қарсы болған еді.
Ол «Біз тіпті ширек жылдан кейін не болатынын болжай алмаймыз» деп, Еуропалық одақтың келесі төрт жыл ішінде Украинаны қаржыландыруға міндеттеме алу идеясына күмән келтірді.
Венгрия басшысының сөзінше, бірнеше жылға созылатын Еуропалық көмек жыл сайын мақұлдануы керек және бұл шешім бірауыздан қабылдануы керек.
