Ұлттық экономика министрі 2022-2024 жылғы бюджет шығыстарын жария етті

Azattyq Rýhy

2023 жылы – 15,6 триллион теңге көлемінде болжанып отыр

2022 жылы республикалық бюджет шығыстары 15,9 трлн теңге болады. Бұл туралы Сенаттың жалпы отырысында ҚР Ұлттық экономика министрі Әсет Ерғалиев мәлім етті, деп хабарлайды Azattyq Rýhy тілшісі.

«Бюджет тапшылығы жалпы ішкі өнімге қатысты 2022 жылы 3,3 пайыз деңгейінде, кейіннен 2024 жылы 2,5 пайызға дейін төмендеуі болжануда. Орта мерзімді кезеңде контрциклдық саясат аясында мұнай емес бюджет тапшылығы деңгейін жалпы ішкі өнімге қатысты 2022 жылы 8,1 пайыздан 2024 жылы 6,3 пайызға дейін төмендейді», - деді «Әлеуметтік-экономикалық даму болжамы» және «Ұлттық қордан кепілдендірілген трансферт туралы» заң жобасы жайлы баяндаған министр.

Министрдің мәліметінше, республикалық бюджеттің шығыстары 2022 жылы – 15,9 триллион теңге, 2023 жылы – 15,6 триллион теңге және 2024 жылы 16 триллион теңге көлемінде болжанып отыр.

«Жалпы үш жылдық бюджет жобасын қалыптастыру мемлекеттік жоспарлау жүйесін трансформациялау жағдайында жүзеге асырылды. Жылдың басында қабылданған жалпыұлттық басымдықтар мен елдің дамуының ұлттық жоспары бюджет саясатының басымдықтарын айқындады. Мемлекеттік органдардың қаржылық қажеттілігіне олардың дамыту жоспарларының мақсаттары мен нысаналы индикаторларына сәйкес басымдық берілді», - деді Әсет Ерғалиев.

×
Бұл желілік ресурстың ақпараттық өнімдері 18 жастан асқан адамдарға арналған.