Президент әділетті әрі таза Қазақстан құру барша азаматтың міндеті екенін айтты
Қасым-Жомарт Тоқаев әділетті, қауіпсіз, озық және таза Қазақстанды құру – барша азаматтың ортақ міндеті екенін мәлімдеді
Президент Қасым-Жомарт Тоқаев әділетті, қауіпсіз, озық және таза Қазақстанды құру – барша азаматтың ортақ міндеті екенін мәлімдеді, деп хабарлайды Azattyq Rýhy Ақордаға сілтеме жасап.
Оның айтуынша, елді дамыту үшін жауапкершілік, адалдық және мемлекет мүддесіне деген қамқорлық қажет.
«Әділетті, Қауіпсіз, Озық және Таза Қазақстанды құру – баршамыздың қастерлі парызымыз. Осы жолда бәріміз белсенді жұмыс істеуіміз керек. Қасиетті Отанымызды дамытудың бұдан басқа жолы жоқ. Бәріміз адал, шыншыл және жауапты да болуымыз қажет», — деді президент.
Мемлекет басшысы сондай-ақ көпшілік алдында айтылатын сөздерге мұқият болуға және олардың ықтимал салдарлары туралы ұмытпауға шақырды. Ол елдегі тұрақтылық азаматтар мен отбасылардың амандығымен тікелей байланысты екенін атап өтті.
«Кейбір уақытта байқалмай айтылған сөздердің зияны басқа әрекеттерге қарағанда әлдеқайда қауіпті болады. Соны ешқашан ұмытпаңыздар. Әрқашанда еліміз туралы ойлап, Қазақстанға қамқоршы болыңыздар. Басқа Отанымыз жоқ», — деді ол.
Президент кездесудің жас қатысушыларына арнайы сөз арнап, олардың волонтерлік қызметке қосқан үлесін атап өтті. Ол Қазақстанда 2020 жыл Волонтер жылы болып жарияланғанын, ал кейінірек еліміз Халықаралық еріктілер жылын белгілеу бастамасын көтергенін еске салды.
«Cіздер – жас, жігерлі азаматсыздар. Волонтерлік қызметпен айналысып жүрсіздер. Өте дұрыс. Мен еріктілердің еңбегін қолдаймын. Бұл – елге шынайы жанашыр болудың нақты көрінісі. Біз 2020 жылды Волонтер жылы ретінде атап өттік. Сондай-ақ Біріккен Ұлттар Ұйымында сөйлеген сөзімде мен Халықаралық волонтерлер жылын белгілеу туралы бастама көтердім. Бұл ұсынысымды әлем елдерінің барлығы дерлік қолдап, 2026 жыл Халықаралық волонтерлер жылы болып жарияланды. Бұл жыл сіздерге арналды», — деп атап өтті Қасым-Жомарт Тоқаев.
Мемлекет басшысы сондай-ақ Қазақстанның көгалдандыру саласындағы халықаралық бастамасы туралы айтып берді. Оның сөзінше, Ғаламшарды көгалдандырудың халықаралық күнін белгілеу туралы ұсыныс «Таза Қазақстан» жалпыұлттық кампаниясы негізінде алға тартылған.
«Сондай-ақ мен былтыр Біріккен Ұлттар Ұйымының мінберінен елімізде «Таза Қазақстан» бірегей жобасы табысты жүзеге асырылып жатқаны туралы айттым. Соның негізінде БҰҰ Бас Ассамблеясының 80 сессиясында 22 сәуірді «Халықаралық жер шарын көгалдандыру күні» деп жариялауды ұсындым. Бұл бастаманы да Біріккен Ұлттар Ұйымы Бас Ассамблеясының барлық мүшесі түгел қолдады деуге болады. Мұның бәрі Қазақстанның дүние жүзіндегі озық үрдістерді терең түсініп, заман талабына сай дамып келе жатқанын көрсетеді. Осылайша, еліміз әлемдегі бейбітшілікті сақтауға өзінің елеулі үлесін қосып отыр», — деді президент.
Сөз соңында Мемлекет басшысы елді одан әрі дамытудағы жас ұрпақтың рөлін атап өтіп, қатысушыларға табыс пен амандық тіледі.
«Еліміздің болашағы – сіздер сияқты білімді, белсенді, көзі ашық, көкірегі ояу, талапты жастардың қолында! Жолдарыңыз әрдайым ашық болсын! Баршаңызға амандық және сәттілік тілеймін!», — деді Мемлекет басшысы.
