Қазақстандықтар енді Қытайда емен-еркін көлік жүргізе алады
Бұл ел Қазақстанның жүргізуші куәлігін таныды
Қазақстан мен Қытай қауіпсіздік саласындағы ынтымақтастықты кеңейтіп, бірнеше уағдаластыққа қол жеткізді, деп хабарлайды Azattyq Rýhy.
Қазақстанның ішкі істер министрлігі таратқан ақпаратқа сүйенсек, болашақта екі ел бір-бірінің жүргізуші куәліктерін өзара таниды.
«Екіжақты келіссөздердің тағы бір нәтижесі - Қазақстан мен Қытай азаматтарының ұлттық жүргізуші куәліктерін өзара тану және алмасу жөнінде уағдаластық болды.. Бұл екі ел азаматтары үшін тиісті рәсімдерді жеңілдетіп, өзара сапарларға қолайлы жағдай жасауға мүмкіндік береді», - деп хабарлайды ішкі істер министрлігі.
Айта кетейік, дереккөзге сүйенсек, Қазақстанның ішкі істер министрі Ержан Сәденов Бейжіңге сапарлаған. Біз атап өткен уағдаластықтар «Орталық Азия – Қыта» форматындағы ішкі істер және қоғамдық қауіпсіздік министрлерінің кездесуі кезінде белгілі болған екен.
«Сәденов Қытай Халық Республикасының қоғамдық қауіпсіздік министрі Ван Сяохунмен екіжақты кездесу өткізді. Тараптар Қазақстан-Қытай арасындағы қауіпсіздік саласындағы ынтымақтастықтың өзекті мәселелері мен бірлескен жұмыстың алдағы бағыттарын талқылады», - деп хабарлайды ІІМ.
