Президент мысал ретінде АҚШ-тың технология саласындағы шешімдеріне тоқталды
Бүгін Астанада өтіп жатқан ауыл әкімдерінің диалог-платформасында Қазақстан президенті Қасым-Жомарт Тоқаев АҚШ президенті Дональд Трамптың стратегиялық бастамасына тоқталды, деп хабарлайды Azattyq Rýhy.
«Осы аптада Президент Дональд Трамп АҚШ-тың технология саласындағы жаһандық үстемдігін қамтамасыз етуге арналған стратегиялық бастамасын жариялады», - деді Тоқаев.
Осылай деген Тоқаев «өркениет көшінен қалмай, технологиялық жаңғыруды жылдамдату қажет» екенін еске салды.
«Ол үшін жасанды интеллектінің бірыңғай платформасы құрылады. Бұл ғылыми зертханаларды, дата орталықтарды, цифрлық модельдерді және суперкомпьютер желісін біріктіретін ұлттық ақыл-ой алаңы болмақ. Аталған жүйе барлық аса маңызды бағыт бойынша жаңа технологиялар мен материалдарды әзірлеуге тың серпін береді. Ол жартылай өткізгіштерден бастап роботты техникаға дейінгі, ядролық энергетикадан бастап биомедицинаға дейінгі салаларды түгел қамтиды. Бұл арада зерттеу жобасы жайында емес, АҚШ-ты осы салада әлемдік көшбасшыға айналдыратын толыққанды платформа жөнінде әңгіме болып отыр», - дейді президент.
Тоқаевтың айтуынша, мұны іске асыру үшін бір жылға жетер-жетпес мерзім беріліп отыр.
«Сол себепті бізге де шара қолдану керек. Әлбетте, Қазақстан жаһандық ауқымдағы көшбасшылыққа таласпайды. Бірақ өркениет көшінен қалмай, технологиялық жаңғыруды жылдамдату қажет. Ойланып-толғанып жүруге уақыт аз», - деді Тоқаев.