Президент ауылдарды цифрлық Қазақстанды бірге құруға шақырды

Мемлекет басшысы Қасым-Жомарт Тоқаев цифрлық Қазақстанды ауылдар мен ауылдық округтерсіз құру мүмкін емес деп мәлімдеді. Бұл туралы президент Астанада өткен ауыл әкімдерінің диалог-платформасында айтты, деп хабарлайды Azattyq Rýhy.

«Ауылдық округтер әкімдері өздерінің кеңейтілген өкілеттіктерін толық іске асырып, салық түсімдерін ұлғайту мақсатында қолданыстағы ақпараттық платформалармен жұмыс істей білуі қажет. Цифрлық Қазақстанды ауылдар мен ауылдық округтерсіз құру мүмкін емес. Жасанды интеллект пен жаппай цифрландыру дәуірінде бұл іске ауыл әкімдері де белсенді түрде атсалысқаны жөн», - деді Тоқаев.

Президенттің айтуынша, елді мекендерді цифрландыру ауыл мен қала тұрғындарының тұрмыс сапасын айтарлықтай теңестіреді. Сондықтан Үкімет бұл бағыттағы жұмысты басты басымдықтардың бірі ретінде қарастыруы қажет.

«Жергілікті жерлерден алынған нақты әрі жедел ақпарат орталықта тиімді шешімдер қабылдауға мүмкіндік береді. Сондай-ақ экономикалық дерекқор негізін қалап, ресурстарды әділ бөлуге ықпал етеді», - деп атап өтті мемлекет басшысы.

Алдағы үш жылда Қазақстанды толықтай цифрлық елге айналдыру – жаңа даму кезеңіндегі басты міндеттердің бірі. Болашақта еліміздің әлемде алатын орны осыған тікелей байланысты. Сондықтан мұны тіршілік үшін талас десек, артық айтқандық емес, деп түйіндеді ойын президент.