Бүкіл еліміз бойынша 2334 ауыл әкімі сайланған
Қазақстандағы ауыл әкімдерінің орташа жасы – 43-те. Бұл туралы бүгін Астанада өтіп жатқан ауыл әкімдерінің диалог-платформасында сөз сөйлеген президент Қасым-Жомарт Тоқаев мәлім етті, деп хабарлайды Azattyq Rýhy.
Оның айтуынша, қазір еліміз бойынша 2334 ауыл әкімі сайланған.
«Бүкіл еліміз бойынша 2334 ауыл әкімі сайланды. Олардың орташа жасы – 43 жас. Жаңадан сайланған әкімдердің үштен бірі – бұрын мемлекеттік қызметте болмаған азаматтар», - деді Тоқаев.
Сондай-ақ президент 2020 жылы халыққа жасаған Жолдауында ауыл әкімдерін тікелей сайлау туралы бастама көтергенін еске салды.
«Бұл мемлекетті басқару ісін түбегейлі жаңғырту жолындағы аса маңызды қадам болды. Себебі жергілікті әкімдер бүкіл билік жүйесінің тірегі саналады. Сондықтан біз орынсыз асығыстыққа жол берген жоқпыз, ауыл әкімдерін сайлау жұмысын 5 жылдың ішінде біртіндеп жүзеге асырдық», - дейді Тоқаев.