Тәжірибесі аз басшылар үшін «AMANAT» партиясының бастамасымен «Әкімдер мектебі» іске қосылды - Тоқаев

Мемлекет басшысы Қасым-Жомарт Тоқаев сайлаушылардың сенімін ақтай алу үшін ауыл әкімдерінің басқару ісіндегі шеберлігін арттыру қажет екенін мәлімдеді, деп хабарлайды Azattyq Rýhy.

Президенттің айтуынша, қазіргі ауыл әкімдерінің 60 пайызға жуығы осы қызметке алғаш рет сайланған.

«Бұл – жергілікті билік құрамы біршама жаңарды деген сөз. Алайда сайлауда жеңіске жету – алдағы үлкен жұмыстың басы ғана. «Әкім болдым, толдым» деп отыруға болмайтыны түсінікті. Әкімдер өздерінің мықты басшы екенін іс жүзінде дәлелдеуі керек. «Басшының бағы – ел-жұрттың қамы» деп бекер айтылмаған. Нағыз елге сыйлы әкім болу үшін ауылдың ахуалын жақсы білу де аздық етеді. Халықтың сенімін ақтап, елдің береке-бірлігін нығайту үшін жұмыс істеу керек», - деді Тоқаев Астанада өткен ауыл әкімдерінің диалог-платформасында.

Оның пікірінше, әкім мемлекеттік деңгейде жасалып жатқан өзгерістерді жергілікті жерде жүзеге асыруға қабілетті болуы қажет.

«Кәсіби тұрғыдан білікті әрі еңбекқор әкім сайлаушылардың сенімін ақтай алады. Сондықтан ауыл әкімдерінің басқару ісіндегі шеберлігін арттыру өте маңызды», -деді мемлекет басшысы.

Осы орайда президент «Amanat» партиясының бастамасымен жүзеге асып жатқан «Әкімдер мектебі» жобасын ерекше атап өтті.

«Әкімдердің арасында бұрын билік жүйесінде жұмыс істемеген азаматтар бар екенін айттық. Олардың тәжірибесі аз екені түсінікті. Осы бағытта «Amanat» партиясының бастамасымен «Әкімдер мектебі» жобасы қолға алынды. Әрине, мұндай курстар жоғары білімнің орнын баса алмайды. Сондықтан университеттерде оқытылатын «Мемлекеттік және жергілікті басқару» бағдарламасын талапқа сай өзгерту керек», - деп мәлімдеді Тоқаев.

Ауыл-аймақтарды басқару, көшбасшылық қабілетті дамыту мәселесі назардан тыс қалған. Ал бұл жұмыспен ең алдымен Мемлекеттік қызмет істері агенттігі шұғылдануы керек. Құзырлы министрлікпен бірлесіп, ауыл әкімдерін даярлауға белсенді түрде кірісу қажет, деп тапсырма берді президент.