Әкім – ең алдымен, халықпен тікелей жұмыс істейтін мемлекеттік қызметші – Тоқаев
Астанада ауыл әкімдерінің диалог-платформасы өтіп жатыр
Бүгін Астанада өтіп жатқан ауыл әкімдерінің диалог-платформасында сөз сөйлеген президент Қасым-Жомарт Тоқаев әкім халықпен тікелей жұмыс істейтін мемлекеттік қызметші екенін еске салды, деп хабарлайды Azattyq Rýhy.
Оның айтуынша, бүгін Астанаға ауыл әкімдерінің басым көпшілігі, яғни 80 пайызы жиналған.
«Жалпы, осындай ауқымды құраммен алғаш рет бас қосып отырмыз. Шын мәнінде, тақырып – өте өзекті. Ауылдың жағдайы – еліміз үшін стратегиялық маңызы бар мәселе. Себебі халқымыздың тамыры – ауылда. Ауылдарымыз мықты болса, еліміз де берекелі болмақ. Сондықтан ауыл әкімдеріне қойылатын талап та, оларға жүктелетін міндет те әрдайым ерекше. Әкім – ең алдымен, халықпен тікелей жұмыс істейтін мемлекеттік қызметші. Бұл – өте жауапты жұмыс. Ауыл әкімі ауылдың болмысын, ауылдағы ағайынның өмірін жете түсінетін нағыз іскер маман болуы керек», - деді Тоқаев.
