«Адал азамат» жобасы балабақша мен колледж бағдарламасына да енеді – Қарин

Мемлекеттік кеңесші Ерлан Қарин «Egemen Qazaqstan» газетіне жазған «Салмақты саясат қағидаттары» атты мақаласында Президент Қасым-Жомарт Тоқаев жуырда қол қойған «Қазақстан Республикасы ішкі саясатының негізгі қағидаттары, құндылықтары мен бағыттарын бекіту туралы» Жарлықтың мән-мағынасын түсіндірді, деп хабарлайды Azattyq Rýhy

Оның айтуынша, бұл – тарихи маңызы бар құжат.

«Себебі бұрын-соңды елімізде ішкі саясаттың идеологиялық бағыты мен ұйымдастырушылық аясын анықтайтын жүйелі, біртұтас акт болған емес», - деп жазған Қарин.

Мемлекеттік кеңесші атап өткендей, тұжырымдамалық құжаттың қажет екені біраз уақыттан бері айтылып келді. Бурабайда өткен Ұлттық құрылтайдың отырысында да сарапшылар мен қаты­су­шы­лар осы мәселеге айрықша назар аудар­ды. Еділ Жаңбыршин, Айдос Сарым, Никита Шаталов, Гүлмира Илеуова, Андрей Чеботарев, Данияр Әшім­баев, Марат Шибұтов және басқалар құжатты әзірлеу керек екенін айтқан.

«Мемлекет басшысы бастаманы қолдап, Президент Әкімшілігіне аталған мәселені жан-жақты зерттеп-зерделеуді тапсырды. Ішкі саясат – мемлекеттің дамуы мен тұрақтылығының басты тірегі. Тәуелсіздік алғалы елімізде әр кезеңде ішкі саясаттың басымдықтарына орай түрлі құжаттар, бағдарламалар қабылданды. Бірақ бұл құжаттарда саланың қағидаттары мен құндылықтары, мақсаттары мен бағыттары біртұтас жүйе ретінде көрсетілмеген еді. Керісінше кейде бір-біріне қайшы келетін нормалар кездесетін. Енді, міне, мемлекеттік деңгейде алғаш рет ішкі саясат ұғымы, оның мақсаттары мен міндеттері, бағыттары жүйелі түрде нақты айқындалып, бекітіліп отыр», - деді Қарин.

Сондай-ақ Қарин атап өткендей, орта білім жүйесіне енгізілген «Адал азамат» бағдарламасы қоғамдық құндылықтарды орнықтыруды көздейді.

«Бағдарлама «мемлекет – мектеп – ата-ана» үш тағанын ортақ мақсат жолында ұштастырады. Мұндай қадам нашақорлықтың, лудоманияның, буллинг пен зорлық-зомбылықтың алдын алады әрі жасампаз құндылықтарды орнықтыруға негіз болады. Қазіргі уақыт­та бағдарламаның тиімділігіне сараптама жүргізіліп жатыр. Алдағы уақытта оны балабақшалар мен колледждерге де енгізу ісі қолға алынады», - деп хабарлады Қарин.

Мемлекеттік кеңесшінің толық мақаласын мына сілтемеден оқи аласыздар.