Қазақстанның үш бірдей қаласында ауа сапасы нашарлайды
Синоптиктер тұрғындарға ескерту жасады
23 қараша күні Алматы, Атырау және Шымкентте ауа сапасының нашарлауына әкелетін қолайсыз метеорологиялық жағдай болады. Бұл туралы «Қазгидромет» мәлімдеді, деп хабарлайды Azattyq Rýhy. .
Қолайсыз метеожағдай деген не?
Қолайсыз метеожағдай — атмосферадағы зиянды заттардың жиналуына ықпал ететін қысқа мерзімді ауа райы құбылыстары.
Оған мыналар жатады: штиль, әлсіз жел, тұман, инверсия. Осы факторлар ауаның төменгі қабатында ластаушы бөлшектердің көптеп шоғырлануына әкеледі, бұл әсіресе ірі қалаларда сезіледі.
Тұрғындарға қандай ұсыныстар берілді
Қолайсыз метеожағдай кезінде мамандар ашық ауада ұзақ жүрмеуге, автожолдар мен өндіріс орындары маңында серуендемеуге, балалар мен қарттарды далада көп ұстамауға кеңес береді.
Созылмалы өкпе, жүрек-қан тамырлары және аллергиялық аурулармен ауыратындар сыртқа шыққанда қажетті дәрілерін өзімен бірге алып жүруге тиіс.
Ауа сапасының нашарлауы кімдерге көбірек әсер етеді
- демікпе және аллергиясы бар адамдарға
- жүрек ауруымен ауыратындарға
- жүкті әйелдерге
- балалар мен қарттарға.
Зиянды бөлшектердің жоғары концентрациясы тыныс алу жолдарының тітіркенуіне және жалпы әлсіздікке әкелуі мүмкін.
