Павлодар тұрғыны пәтерін өзі сатқанына қарамастан риелторға 300 мың теңге төлейтін болды

Павлодар облыстық соты қала тұрғынынан пәтерін өз бетінше сатқанына қарамастан 300 мың теңге өндірді. Сот тараптар қол қойған келісім талаптары кез келген жағдайда тапсырыс берушінің сыйақы төлеуін міндеттейтінін негізге алды, деп хабарлайды Azattyq Rýhy.

Сот талқылауы барысында анықталғандай, жеке кәсіпкер мен азаматша Ю. арасында пәтерге сатып алушы іздеу жөнінде келісімшарт жасалған. Құжатта тапсырыс беруші объектіні келісімшарт мерзімі ішінде сатып жіберсе, тіпті сатып алушыны өзі тапқан күннің өзінде 800 000 теңге төлеуге міндетті екені нақты көрсетілген.

Ю. шынымен де пәтерін өз күшімен сатқан, алайда риелторға сыйақы төлемеген. Бірінші инстанция соты талапты қанағаттандырудан бас тартып, келісім талаптарын жосықсыз деп бағалаған.

Алайда апелляциялық алқа бұл шешіммен келіспеді.

«Келісімшарт ерікті түрде жасалған, ал Азаматтық кодекстің 272-бабы міндеттемелердің тиісінше орындалуын талап етеді. Сонымен қатар, ҚР АК-нің 683-бабы тапсырыс берушіні көрсетілген қызмет үшін ақы төлеуге тікелей міндеттейді. Келісімшарт әрекет еткен кезеңде пәтер сатылғаны төлем жасауға негіз болып саналады», – деп мәлімдеді сотта.

Келісімнің 4-тармағына сәйкес, алқа азаматша Ю.-дан жеке кәсіпкердің пайдасына 300 000 теңге өндіруді қаулы етті.

Бірінші инстанция сотының шешімі күшін жойды. Апелляциялық шағым қанағаттандырылды, қаулы заңды күшіне енді.