Каспий жағалауында 112 итбалықтың өлексесі табылды

Маңғыстау облысының экология департаменті мен балық инспекциясы басқармасының мамандары Түпқараған ауданының жағалауынан 112 итбалықтың өлексесін тапты, деп хабарлайды Azattyq Rýhy.

Ведомствоның мәліметінше, 3 қараша күні тұрғындардан келген хабарламадан кейін зертханалық-талдамалық бақылау бөлімінің мамандары Форт-Шевченко және Баутино елді мекендері маңындағы теңіз суынан сынама алған.

Мониторинг барысында Асан ауылынан Баутино мүйісіне дейінгі жағалау тексеріліп, әртүрлі дәрежеде ыдыраған 112 итбалықтың өлексесі табылған.

Атап айтқанда:

• Асан ауылынан Форт-Шевченко жағажайына дейін – 39 өлексe,
• Форт-Шевченко жағажайынан Баутино мүйісіне дейін – 73 өлексe.

Өлі жануарлар туралы ақпарат 112 қызметіне тіркеліп, хабарландыру алгоритміне сәйкес жіберілді, деп хабарлады өңірдің экология департаменті.