Теміртауда қарт кісіні ұрып-соғып, тонап кеткен бір топ бозбала 7 жылға сотталуы мүмкін

Теміртауда егде жастағы ер адамды ұрып-соғып, тонаған тоғыз бозбаланың ісі бойынша сот процесі жалғасып жатыр. Прокурор кезекті отырыста айыптау қорытындысын жариялады, деп хабарлайды Azattyq Rýhy.

Кімдер айыпталып отыр

Бұл іс бойынша 9 адам жауапқа тартылған. Олардың жетеуі – жасөспірім, ал екеуі – ересек. Ең үлкені – 33 жастағы ер адам, ол бұрын да тонау және ұрлық ісі үшін сотталған.

Қылмыс қалай жасалды

Тергеу деректеріне сәйкес, биыл наурыз айында жасөспірімдер мен ересектерден құралған топ Теміртауда жалғыз тұратын қарияның үйіне баса-көктеп кірген.

Олар зейнеткерді ұрып, балағаттаған және ол сәтті видеоға түсіріп, кейін оны мессенджердегі топқа жіберген.

Үш рет тонау фактісі анықталды

Temirtau.city мәліметінше, тергеу барысында күдіктілер зейнеткердің үйіне үш рет кіргені белгілі болды. Олар 67 жастағы ер адамның ақшасын, ұялы телефондарын және банк картасын алып кеткен.

Бұған дейін де топ мүшелері жалғыз тұратын 37 жастағы ер адамды тонаған.

Соттағы жағдай

Келесі сот отырысында куәлардан жауап алу және дәлелдемелерді зерттеу жоспарланған. Ал бүгінгі отырыста айыпталушылар тәртіп сақтамағаны үшін судьядан ескерту алды.

Қандай жаза берілуі мүмкін

Айыпталушыларға 7 жылға дейін бас бостандығынан айыру жазасы қарастырылған. Қалалық прокуратура істің қатаң бақылауда екенін мәлімдеді.