Семейдегі сайлау: тұрғындар алғаш рет өңір орталығының әкімін таңдап жатыр

12 қазан күні Семей қаласында әкім сайлауы басталды. Бұл – ел тарихындағы алғашқы жағдай, яғни алғаш рет өңір орталығының тұрғындары өз әкімін тікелей дауыс беру арқылы таңдап отыр, деп хабарлайды Azattyq Rýhy.

128 сайлау учаскесі ашылды

Семейде таңғы сағат 07:00-де сайлау учаскелері ашылды.

Қала аумағында 128 сайлау учаскесі жұмыс істеп тұр:

• 110 ашық учаске – барлық тұрғын үшін;
• 18 жабық учаске – уақытша өзге жерде жүрген азаматтарға арналған.

Қалалық әкімдіктің хабарлауынша, сайлау комиссияларының құрамында 929 адам бар.

Қаладағы сайлаушылар саны – 220 761 адам.

Әкім лауазымына үш кандидат тіркелген

Семей қаласының әкімі лауазымына үш үміткер ұсынылды:

• Әділет Қожанбаев – Көкпекті ауданының қазіргі әкімі;
• Айболат Бекжасаров – қалалық мәслихаттың бұрынғы төрағасы;
• Қанық Төлеуов – Геодезия, картография және құрылыс жоғары колледжінің директоры.

Бұл сайлау — жергілікті өзін-өзі басқару реформасының нақты көрінісі. Бұған дейін облыс және аудан орталықтарындағы әкімдер президенттің келісімімен тағайындалса, енді тұрғындардың тікелей таңдауы шешуші рөл атқарады.