Метрода босанған: Ташкентте әйел адам мен сәбиге өмір бойы тегін жүруге арналған карта сыйға берілді

Өзбекстан астанасында Ташкент метросының жолаушысы аяқастынан толғағы келіп, тура станцияда босанды. Ташкенттік метрополитен ана мен сәбиге ерекше сыйлық жасады, деп хабарлайды Azattyq Rýhy.

Оқыс оқиға өткелде болған. Ішкі істер қызметкері жағдайды байқап, кезекшіге хабар берген.

Метро қызметкерлері өздері босануға көмектесті

Дәрігерлер жеткенше, метрополитен қызметкерлері өз күшімен әйел адамды босандырып алды.

«Кезекші қызметкер алғашқы медициналық көмек көрсетіп, әйелдің сәбиді аман-есен дүниеге әкелуіне көмектесті. Ол нәрестенің кіндігін байлап, тыныс алуын қалыпқа келтірді. Барлығы сәтті өтті», – делінген ресми хабарламада.

Ана мен бала дәрігерлерге тапсырылды

Жедел жәрдем келген соң, ана мен жаңа туған сәби медицина қызметкерлеріне тапсырылды. Метро қызметкерлері дәрігерлер келгенге дейін олардың жағдайын бақылап, қауіпсіздігін қамтамасыз еткен.

Ерекше сый: өмір бойы тегін жол жүру

Ташкент метрополитенінің басшылығы ана мен жаңа туған қыз балаға өмір бойына тегін жүруге арналған метро картасын сыйлады. Сондай-ақ, босануға көмектескен қызметкерлерді марапаттау туралы шешім қабылданды.

Қалалық метрополитен мәліметінше, ана мен нәрестенің жағдайы жақсы, дәрігерлердің бақылауында.