Жасанды интеллект депутаттарды алмастыра ала ма – Кай-фу Ли жауап берді

Парламент Мәжілісінің депутаты «AMANAT» партиясы фракциясының мүшесі Айдос Сарым Astana Open Dialogue тәуелсіз аналитикалық платформасының III отырысында Әлемдік AI сарапшы Кай-фу Лиден «жасанды интеллект депутаттарды алмастыра ала ма?» деп сұрады, деп хабарлайды Azattyq Rýhy.

«Адамдарда өзіндік сана бар, сондықтан олар қайталанбас әрі ерекше. Біз де әр адамның өзіне тән қасиеттерін сақтап қалғанын қалаймыз. Ал егер барлық басқаруды жасанды интеллект (AI) өз қолына алса, ол тек процестерді оңтайландырумен шектеледі», - деді Ли. 

Ол алдағы кездесуін мысалға алды. 

«Менің ойымша, заң шығарушы билік, атап айтқанда Сенат, AI-ды пайдалана алады. Себебі заңдар өте күрделі, ал құқықтық тіл – түсінікті болғанымен, бәріміз үшін оңай қабылдана бермейді. Жасанды интеллект не істей алады? Ол заңнаманың тұрақтылығын, бірыңғай тәсілін қамтамасыз ете алады, олқылықтарды анықтап, оларды шешу жолдарын ұсына алады. Біз кейде үлкен көлемді құжаттарға толық мән бермей қол қоямыз. Ал AI болса, мұндай олқылыққа жол бермей, құжаттардың мазмұнын түсінуге көмектеседі», - дейді ол.

Ол атағандай, бізде сайланбалы тұлғалардың болуының басты себебі – олардың халыққа есеп беруі. 

«AI-дың артықшылығы ол жаңа идеяларды ұсына алады және бар мәселені де сынға ала алады. Мәселен, Сенат арқылы жаңа заң жобасын ұсынғыңыз келсе, бірінші қойылатын сұрақ: қандай қарсылықтар туындауы мүмкін және оларды қалай шешуге болады? Міне, осы жерде AI көмек бере алады. Жасанды интеллект пайдалы бола алады. Сенат – бұл адамдар тобы, олар үлкен көлемді деректерді кодификациялай алады. Алайда бұл деректер әрдайым бірізді бола бермейді. Сондықтан әрбір заң шығару органына AI көмекшісі ұсынылуы керек. Бұл көмекші ұсынылған құжаттардың елдің мақсаттарына, қоғамның құндылықтарына, сайлаушылардың сенімдеріне және заң жобасын ұсынған парламентшінің құндылықтарына сәйкес келуін қамтамасыз ете алады»,- дейді Ли. 

Оның айтуынша, бұл демократияны одан әрі тиімді ете алады. 

«Менің ойымша, AI адамдарды бөлу үшін емес, біріктіру үшін пайдаланылуы мүмкін»,- деді ол.