«Қарасора» жедел іс-шарасы аясында операция өтті
Жетісу облыстық полиция департаментінің есірткі қылмысына қарсы іс-қимыл басқармасы прокуратура өкілдерімен бірлесіп «Қарасора» жедел-профилактикалық іс-шарасы барысында есірткіні тасымалдаудың ірі арнасын әшкереледі, деп хабарлайды Azattyq Rýhy.
Сотқа дейінгі тергеу кезінде Алматыдан Жетісу облысына есірткі тасымалдаумен айналысқан азамат анықталды. Жедел-іздестіру іс-шаралары нәтижесінде Алматы облысының Шамалған ауылында 51 жастағы ер адам қолға түсті.
Полиция күдіктінің тұрғылықты жерін және Жамбыл облысы Меркі ауданындағы мал шаруашылығы қоймасын (фазенда) тінту барысында ерекше иісі бар, қарасораға ұқсас өсімдік тектес заттарды тапты. Сараптама қорытындысы олардың кептірілген марихуана екенін растады. Жалпы салмағы – 10 келіден астам.
Күдікті қамауға алынды, тергеу амалдары жалғасуда. Сарапшылардың бағалауынша, тәркіленген есірткі 10 мыңнан астам адамды тыйым салынған заттарды тұтынуға тартуы мүмкін еді. Полицияның жедел іс-қимылының арқасында қауіпті заттың таралуына жол берілмеді.
Заңнамаға сәйкес, есірткі заттарын заңсыз сатып алу, сақтау, тасымалдау немесе өткізу ауыр қылмыс болып саналады. Мұндай іс-әрекет мүлкін тәркілей отырып, 7 жылдан 12 жылға дейін бас бостандығынан айыру жазасына әкеп соғады.