Жамбыл облысында санаулы күнде төбелестен екінші оқушы көз жұмды
Жазатайым оқиға дәретхананың ішінде болған
Жамбыл облысында бірнеше күннің ішінде төбелестен тағы бір оқушы көз жұмды, деп хабарлайды Azattyq Rýhy.
Желіде тараған мәліметке сүйенсек, жазатайым оқиға дәретхананың ішінде болған. 9-сыныптың оқушысына кеуде тұсынан соққы тиіп, сол жерде тіл тартпай кетті.
Оқиғаға қатысты агенттік тілшісі Жамбыл облыстық Полиция департаментінің баспасөз қызметіне ресми сауал жолдап, мынандай жауап алды:
«Аталған факті бойынша ҚР ҚК 106-бабының 3-бөлігімен сотқа дейінгі тергеу басталды. Жедел-іздестіру іс-шаралары барысында полиция қызметкерлері күдікті жасөспірімді анықтап, уақытша ұстау изоляторына қамады.
Қазіргі уақытта істі толық, объективті және жан-жақты тергеуге бағытталған барлық қажетті жедел-тергеу іс-шаралары жүргізіліп жатыр.
ҚР ҚПК-нің 201-бабына сәйкес, тергеудің мүддесі үшін өзге деректер жария етілмейді», – делінген ПД хабарламасында.
Айта кетейік, осыған дейін Шу ауданының Көкқайнар ауылында 10 және 11-сынып оқушылары арасындағы футбол матчы жанжалға ұласып, соңы төбелеспен аяқталды. Жанжал барысында 11-сынып оқушысы 10-сыныптағы қарсыласына кеуде тұсынан соққы жасаған. Зардап шеккен бала есінен танып қалған. Оны үйіне жеткізген соң, ата-анасы дәрігер шақырғанымен, жасөспірім жедел жәрдем келмей жатып көз жұмған.
