Қазақстанның 17 өңірінде ауа райына байланысты дауылды ескерту жарияланды

«Қазгидромет» 8 қыркүйекке арналған дауылды ескерту жариялады. Еліміздің басым бөлігінде найзағай, бұршақ, қатты жаңбыр, шаңды дауыл және екпінді жел болжануда, деп хабарлайды Azattyq Rýhy. 

Астанада күн күркіреп, бұршақ жаууы мүмкін. Желдің күші 15–20 м/с-қа дейін жетеді. Сонымен бірге, жоғары өрт қаупі сақталады.

Шымкент пен Түркістан облысында желдің жылдамдығы 20 м/с-қа дейін күшейіп, шаңды дауыл тұрады. Мұнда да өрт қаупі бар.

Қауіп жоғары аймақтар

Синоптиктердің болжамынша, қатты жел мен нөсер күтілетін өңірлер:

• Ұлытау облысы – найзағай, шквал, бұршақ;
• Қарағанды облысы – найзағай мен дауыл, жел 20 м/с дейін;
• Ақмола облысы – қатты жаңбыр, бұршақ, түнде тұман;
• Абай облысы – найзағай, жел 28 м/с дейін күшеюі ықтимал;
• ШҚО – бұрша, тұман;
• Қызылорда облысы – шаңды дауыл;
• Ақтөбе облысы – түнде найзағай, желдің күшеюі;
• Жетісу, Алматы, Жамбыл облыстары – таулы аймақтарда найзағай, екпінді жел;
•  Павлодар, Қостанай, СҚО – түнде тұман, күндіз нөсер;
• Маңғыстау облысы – тұман, жоғары өрт қаупі;
• Атырау облысы – өрт қаупі өте жоғары.

Халыққа кеңес

Төтенше жағдайлар қызметі тұрғындарға сақ болуды ескертеді:

• Найзағай кезінде ашық алаңда жүрмеу;
• Жел күшейгенде ағаш астында және ескі ғимарат жанында тұрмау;
• Шаңды дауыл кезінде көз бен тыныс жолдарын қорғау;
• Орман мен далада от жақпау.