Польшада авиашоуға дайындық кезінде F-16 ұшағы құлады
Куәгерлер әуе апатын видеоға түсіріп алған
Польшада әскери-әуе күштеріне тиесілі F-16 жойғыш ұшағы халықаралық AirShow Radom шоуына дайындық кезінде апатқа ұшырады, деп хабарлайды Azattyq Rýhy.
Оқиға Радом қаласының маңында болды. Үкіметтің өкілі Адам Шлапка әлеуметтік желіде бұл қайғылы жағдайды растады.
Шлапканың мәліметінше, ұшақ маневрлер орындап жатқан кезде кенеттен биіктіктен төмен құлап, жарылған. Өкінішке қарай, пилот оқиға орнында қаза тапқан. Куәгерлер әуе апатының сәтін видеоға түсіріп алған.
Польша баспасөзі таратқан деректерге сәйкес, ұшақ AirShow Radom 2025 халықаралық авиасалонына дайындық аясында жоспарлы түрде жаттығып жатқан. Шара 30-31 тамыз күндері өтуі тиіс еді. Қазіргі таңда авиашоудың ұйымдастырылуы не болмайтыны туралы ақпарат жоқ.
