Латвияда мұғалім 8 жыл бойы 200-ге жуық баланы зорлап, азғындық әрекетін видеоға түсірген

Латвияда балаларға қатысты зорлық-зомбылық және порнография дайындаумен айналысты деген айыппен 37 жастағы мұғалім ұсталды. Бұл туралы Azattyq Rýhy агенттігі LSM басылымына сілтеме жасап хабарлайды.

Латвияда 37 жастағы мұғалім ұсталды. Ол балаларға қатысты зорлық-зомбылық жасаумен және кәмелетке толмағандарды қамтитын порнографиялық материалдар жасаумен айналысты деген күдікке ілінді. Тергеу нұсқасы бойынша, соңғы 8 жыл ішінде ер адам кемінде 180 балаға азғындық әрекет жасаған.

Аталмыш басылымның мәліметінше, тінту кезінде құқық қорғау органдары зорлық-зомбылық материалдары бар ақпарат тасымалдағыштарды анықтаған. Тергеу көрсеткендей, 2016-2024 жылдар аралығында күдікті видеоқоңырауларды жасырын жазып, балаларды киімдерін шешуге көндірген. Оның құрбандары – 5-тен 12 жасқа дейінгі қыз балалар.

2016 және 2017 жылдары ер адам кәмелетке толмағандармен достық байланыс орнатып, оларды кейін порнографиялық материал жасау үшін пайдаланғаны анықталды. Жалпы 266 осындай видео табылған. Сонымен қатар, 2016 жылы күдікті өз қамқорлығында болған кәмелетке толмаған қызға қатысты сексуалдық зорлық-зомбылық жасаған.

Айта кету керек, күдікті ұсталғанға дейін мектепте мұғалім болып жұмыс істеген. Қазіргі уақытта қылмыстық іс прокуратураға жолданған.