Астанада екі айда 35 келіден астам есірткі тәркіленді

Астаналық полицейлер «Қарасора-2025» жедел-профилактикалық іс-шарасының алғашқы нәтижелерін жариялады. Іс-шара 2025 жылдың 1 маусымынан бері жүргізіліп келеді, деп хабарлайды Azattyq Rýhy. 

«Екі ай ішінде 195 есірткіге қатысты құқықбұзушылық анықталып, заңсыз айналымнан 35 келіден астам түрлі есірткі заттары тәркіленді», – деп хабарлады елордалық полиция департаментінің баспасөз қызметі.

Нақты сандар мен көрсеткіштер

• 80-ге жуық адам тыйым салынған заттарды медициналық мақсатсыз қолданғаны үшінәкімшілік жауапқа тартылды;
• 28 есірткі тасымалдаушы ұсталды;
•  302 есірткі жарнамалаған сайт бұғаттауға жіберілді;
• 173 банктік шотқа тосқауыл қойылып, олардың айналымындағы қаржы көлемі 2 миллион теңгеден асты.

Жыл басынан бері көрсеткіш

Астана полициясының мәліметінше, 2025 жылдың басынан бері елордада:

• 276 есірткіге қатысты құқықбұзушылық тіркелді;
•  778 интернет-ресурс бұғатталды;
• заңсыз айналымнан шамамен 400 келі есірткі заты алынды.