Боксшы жай соққымен-ақ тақтайды қақ бөлген
Ұлттық олимпиадалық комитеттің президенті, белгілі кәсіпқой боксшы Геннадий Головкин Астанадағы таеквондодан халықаралық турнирдің ашылу салтанатында өз аты жазылған тақтайды сындырды, деп хабарлайды Azattyq Rýhy.
Ұлттық олимпиадалық комитеттің Instagram-да жариялаған видеосынан Головкиннің Бүкіләлемдік таеквондо федерациясының президенті Чунгвон Чоу ұстап тұрған тақтайды сындырғанын көруге болады. Боксшы жай соққымен-ақ тақтайды қақ бөлген.
Еске сала кетейік, Бүкіләлемдік таеквондо федерациясының президенті мемлекет басшысы Қасым-Жомарт Тоқаевқа ерекше құрметтің белгісі ретінде тоғызыншы дан қара белбеуін табыс еткен болатын. Ресми бөлімнен кейін мәртебелі қонақ мемлекет басшысына жекпе-жек өнерінің дәстүріне сай ағаш тақтайды сындырып көруді ұсынды.
Видеода Қасым-Жомарт Кемелұлы жымиып: «Really?» («Шынымен бе?») – деп сұрайды. Ұсыныстың әзіл емес екеніне көз жеткізгеннен кейін, президент бір соққымен тақтайды оп-оңай қақ бөлді.
Ал Қазақстан президенті әлемде таеквондоның дамуына елеулі үлес қосқаны үшін Чунгвон Чоуды ІІ дәрежелі "Достық" орденімен марапаттады.