Ақтауда жүргізуші әйел адамды екі баласымен бірге қағып кетті

Ақтау қаласында 10 тамыз күні сағат шамамен 21:10-да жаяу жүргіншілер өткелінде Hyundai Elantra жүргізушісі әйел адамды екі баласымен бірге қағып кетті, деп хабарлайды Azattyq Rýhy.

Балалар жарақат алып, ауруханаға түсті

Lada.kz мәліметінше, анасы дәрігерлердің тексеруінен кейін үйіне жіберілді, ал екі бала жарақат алып, Маңғыстау облыстық көпбейінді балалар ауруханасына жеткізілді.

Медициналық мекеме мәліметінше:

• 2018 жылы туған бала орташа ауырлықтағы ми шайқалу диагнозымен ем қабылдауда;
• 2023 жылы туған бала жамбасының орын ауысқан сынуымен ауыр, бірақ тұрақты жағдайда.

Дәрігерлер стандарттарға сай ем-дом жүргізіп жатыр.

Көлік айыптұраққа қойылды, тергеу жүріп жатыр

Жүргізушінің көлігі айыптұраққа қойылып, оған Әкімшілік құқық бұзушылық кодексінің 610-бабы бойынша (Денсаулыққа зиян келтіруге әкеп соққан ЖҚЕ бұзуы) хаттама толтырылды. Қазіргі уақытта оқиға бойынша тергеу амалдары жүргізілуде.