Бұл жер Қамқалы ауылының тұрғындарына берілді
Сарысу аудандық прокуратурасы пайдаланылмай жатқан ауыл шаруашылығы жерлерін анықтап, мемлекет меншігіне 4 995 гектар жерді қайтарды, деп хабарлады Azattyq Rýhy.
Прокуратура ауыл шаруашылығы мақсатындағы жерлерге талдау жүргізу барысында, «К» ЖШС-ға 2023 жылы берілген жер учаскесінің нысаналы мақсатына сай пайдаланылмағанын анықтады.
Қадағалау актісінің нәтижесінде, жалпы кадастрлық құны 27,9 миллион теңгеден асатын 4 995 гектар жер мемлекет меншігіне өтті.
Бұл – ауыл шаруашылығы саласындағы заң талаптарын сақтаудың маңыздылығын көрсетеді.
Қайтарылған жер учаскелері Қамқалы ауылдық округінің тұрғындарына мал жайылымы ретінде бөлінді.
Бұл ауылдағы мал шаруашылығымен айналысатын азаматтар үшін үлкен қолдау болмақ.
Сарысу ауданының прокуратурасы жер қатынастары саласындағы заңнаманы қатаң сақтаудың маңыздылығын ескертеді және бұл бағыттағы тексерістер алдағы уақытта да жалғасатынын хабарлады.