Алматыда 39 градус ыстықтан өрт қаупі күшейді. ТЖД ескерту жасады
Қалада өрт қауіпсіздігінің ең жоғары — бесінші деңгейі жарияланды
Алматы қаласында күннің аптап ыстығына байланысты өрт қауіпсіздігінің ең жоғары — бесінші класы жарияланды. Қала билігі мен төтенше жағдайлар қызметі тұрғындарды сақ болуға шақырып отыр, деп хабарлайды Azattyq Rýhy.
Қалалық ТЖД дабыл қақты
Алматыда 28 шілдеге дейін күн +35–39° аралығында ыстық болады деп күтілуде. Осыған байланысты ТЖД мамандары қала маңында бесінші деңгейлі төтенше өрт қаупі жарияланғанын мәлімдеді.
«Мұндай ауа райында кішкентай ғана ұшқынның өзі үлкен өртке себеп болуы мүмкін. Қазір қала бойынша 104 шақырым аумақта құрғақ шөп шабу жұмыстары жүргізіліп жатыр», – делінген Алматы қалалық ТЖД хабарламасында.
Алматы тұрғындарына маңызды ескерту
Төтенше жағдайлар департаменті мен қала әкімдігі тұрғындар мен қонақтарға бірқатар қауіпсіздік шараларын сақтау қажеттігін ескертеді:
- Құрғақ шөп, ағаш қалдықтарын жағуға болмайды
- Алаудай от жағу, темекі тұқылын тастау — аса қауіпті
- Электр желісін шамадан тыс жүктемеу керек
- Бірнеше қуатты құрылғыны бір розеткаға қоспау қажет
- Көлікте балаларды жалғыз қалдырмау
- Күн астында ұзақ болудан аулақ болып, күн өту мен ыстық соққысынан сақтану қажет.
«Ережені елемегендер заң бойынша жауапқа тартылады», – деп ескертті ТЖД.
