Маңғыстау облысындағы мектептің шатыры опырылып түсті: тергеу жүріп жатыр
Мектеп-гимназия 2009 жылғы қыркүйекте пайдалануға берілген
Маңғыстау облысы Қарақия ауданына қарасты Құрық ауылында 23 шілде күні таңғы сағат 6:30 шамасында жалпы білім беретін мектеп-гимназияның акт залында шатырдың бір бөлігі опырылып түскен. Оқиғаға қатысты сотқа дейінгі тергеу жүріп жатыр, деп хабарлайды Azattyq Rýhy Маңғыстау облысының Қоғамдық коммуникациялар орталығына сілтеме жасап.
250 шаршы метр шатыр құлаған
Алдын ала мәлімет бойынша, құлаған шатыр аумағы 250 шаршы метрді құрайды. Қазіргі уақытта оқиға орнында сарапшы мамандар жұмыс істеп жатыр. Техникалық тексеру жүргізіліп, бұзылу себептері анықталуда. Қауіпсіздік мақсатында мектеп аумағына кіруге уақытша тыйым салынды.
Арнайы комиссия құрылды
Оқиғаның мән-жайын анықтау үшін құзырлы мемлекеттік органдардың қатысуымен ведомствоаралық комиссия құрылды. Қазіргі таңда ҚР ҚК 278-бабы 2-бөлігі («Ғимараттарды, құрылыстарды немесе олардың бөліктерін пайдалануға қабылдау кезінде қауіпсіздік талаптарын бұзу») бойынша сотқа дейінгі тергеп-тексеру амалдары басталды.
Мектеп 2009 жылдан бері пайдаланылып келеді
Мектеп-гимназия 2009 жылғы қыркүйекте пайдалануға берілген. 1 200 оқушыға арналған білім ордасы алдын ала мәлімет бойынша апатты жағдайда болмаған.
Ахуал әкімдік бақылауында
Оқиға орнына Маңғыстау облысы әкімінің бірінші орынбасары Ербол Ізбергенов барып, зақымданған залды қарап шықты және жағдаймен жеке танысты.
Қазіргі уақытта мектеп аумағына бөгде адамдардың кіруіне уақытша тыйым салынған.
