Алматыда жол ортасында көлігін бұрып, артқа жүрген жүргізуші қамауға алынды

Желіде бірнеше жүргізушінің жол қозғалысы ережесін өрескел бұзған сәті түсірілген бейнежазба тарап кетті. Кадрлардан қарама-қарсы жолақпен жүру, артқа қозғалу, агрессивті жүргізу және басқа да қауіпті маневрлерді көруге болады, деп хабарлайды Azattyq Rýhy.

Полиция жүргізушілерді тапты

Аталған жайт бойынша жергілікті полиция қызметі тексеру жүргізіп, жүргізушілердің кім екенін анықтады. Барлық автокөлік арнайы айыппұл тұрағына қойылды.
Сот шешімімен бір жүргізуші 10 тәулікке әкімшілік қамауға алынды – ол жол қозғалысына қауіп төндіріп, көлікті кері бағытта жүргізген.

Полиция: «Жол – бейқамдықты кешірмейді»

Жергілікті полиция қызметі басқармасының бастығы, полиция полковнигі Серік Шумаев жолдағы тәртіпсіздік ауыр зардаптарға әкелуі мүмкін екенін ескертті.

«Жол – бейқамдықты кешірмейді. Ереже бұзғандар жазасыз қалмайды. Қоғамдық резонанс тудырған осындай өрескел құқықбұзушылықтардың алдын алу бағытында жұмыс жалғасады», – деді ол.

Жол қозғалысына құрмет – әркімнің міндеті

Алматы қалалық полиция департаменті барлық азаматтарды жол ережелерін сақтауға, басқа қатысушыларға құрметпен қарауға шақырады.