Тамыз айындағы ҰБТ: өтініш қабылдау 25 шілдеде басталады

Тамыз айында өтетін Ұлттық бірыңғай тестілеуге (ҰБТ) қатысу үшін өтініштер 25 шілдеден бастап 5 тамызға дейін қабылданады. Бұл туралы Ұлттық тестілеу орталығы хабарлады, деп жазады Azattyq Rýhy.

Тіркелу қайда жүргізіледі?

Тестілеуге тіркелу app.testcenter.kz сайтында жүргізіледі.

Тамыздағы ҰБТ 10-14 тамыз аралығында өтеді.

Тамыздағы ҰБТ не үшін қажет?

Бұл тестілеу шекті балл жинай алмаған талапкерлерге ЖОО-ға ақылы негізде түсу мүмкіндігін беру үшін өткізіледі.

Тіркелу кезінде талапкерлер таңдай алады:

• тест тапсыратын орын;
• күні мен уақыты.

Пән таңдау мүмкіндігі

Негізгі ҰБТ-ға қатысқан талапкерлер тамыздағы тестілеуде бейіндік пәндер комбинациясын өзгерте алады.

Тамыздағы тестілеуге кімдер қатыса алады?

Тамыз айындағы ҰБТ-ға қатысуға құқығы бар:

• биылғы және өткен жылғы мектеп түлектері;
• колледж түлектері;
• қандастар (ҚР азаматы емес, ұлты қазақ азаматтар);
• шетелдік орта білім ұйымдарын бітіргендер;
• шығармашылық мамандықтан басқа бағыттарға немесе басқа мамандықтан педагогикалық мамандықтарға ауысқысы келетін студенттер;
• шартты түрде ЖОО-ға қабылданғандар.

Колледж түлектері үшін ерекшелік

Өз мамандығы бойынша оқуды ақылы негізде жалғастырғысы келетін колледж түлектері ЖОО-ға әңгімелесу нәтижесімен қабылданады.

Бұл қабылдауды ЖОО-лардың қабылдау комиссиялары жүргізеді.