Қазақстанның астығын, еті мен сүтін Грузияға экспорттау мәселесі талқыланды
Олжас Бектенов пен Грузия экономика министрі Транскаспий дәлізін дамыту мәселесін талқылады
Премьер-министр Олжас Бектенов Грузияның экономика және тұрақты даму министрі Мариам Квривишвилимен ресми кездесу өткізді. Тараптар сауда-экономикалық ынтымақтастықты кеңейту, инвестициялық жобаларды дамыту және Транскаспий халықаралық көлік бағыты (ТХКБ) аясындағы ынтымақтастық мәселелерін қарастырды, деп хабарлайды Azattyq Rýhy.
Қазақстан мен Грузия арасындағы тауар айналымы өсіп келеді
2025 жылдың қаңтар-мамыр айларында екі ел арасындағы тауар айналымы 75,2 млн АҚШ долларын құрады. Бұл өткен жылдың сәйкес кезеңімен салыстырғанда 35,7%-ға артық.
Ауыл шаруашылығы өнімдерінің, оның ішінде астық, ұн, ет-сүт және кондитерлік тауарлардың жеткізілімі де талқыланған негізгі бағыттардың бірі болды.
Логистика мен инфрақұрылым – өзара іс-қимылдың негізгі бағыты
Тараптар көлік-логистикалық байланысты нығайту қажеттілігіне ерекше назар аударды. 2025 жылдың бірінші жартыжылдығында теміржол арқылы тасымалданған жүк көлемі 159,5 мың тоннаны құрап, өткен жылмен салыстырғанда 67%-ға артты.
PTC Holding компаниясы жүзеге асырған маңызды жоба — Поти портындағы жаңа қазақстандық контейнер терминалы. Оның жылдық қуаты 120 мың ЖФЭ (жиырма футтық эквивалент) құрайды. Бұл – Грузиядағы теңіз портында іске қосылған алғашқы қазақстандық инфрақұрылымдық жоба.
«Бұл Транскаспий бағыты бойынша жүктер ағынын арттырудағы маңызды қадам. Жоба Ляньюньган және Сиань қалаларындағы терминалдармен үйлесе отырып, Қазақстанның қолданыстағы инфрақұрылымын толықтырады», — деді Олжас Бектенов.
Мұнай терминалдары мен туризм әлеуеті кеңейтіледі
Кездесуде Батуми мұнай терминалы мен портының қуатын кеңейту, сондай-ақ туристік бағыттарды жандандыру мүмкіндіктері де талқыланды. Грузия тарапы сауда, туризм және логистикалық инфрақұрылым бағыттарында Қазақстанмен әріптестікті одан әрі тереңдетуге мүдделі екенін жеткізді.
Тараптар уағдаластықтарды іске асыруға дайын
Кездесу соңында Қазақстан мен Грузия үкіметтері қол жеткізілген уағдаластықтарды жүйелі түрде жүзеге асыруға, сондай-ақ Үкіметаралық комиссия шеңберінде жұмысын жалғастыруға ниетті екенін мәлімдеді.
