Павлодар тұрғыны пәтерін сатып, ақшаны алаяқтарға такси арқылы беріп жіберген

Павлодарда жыл басынан бері 830 интернет-алаяқтық тіркелді. Олардың қатарында қаскөйлер әйелді үйін сатуға көндіріп, қолма-қол ақшаны алу үшін оған такси жүргізушісін жіберген оқиға да бар, деп хабарлайды Azattyq Rýhy.   

Пәтерді сатуға көндірген

Павлодар облысы полиция департаментінің мәліметінше павлодарлыққа № 2 емхананың «қызметкері» қоңырау шалып, флюорографиядан өту қажеттігін хабарлаған.

«Біраз уақыттан кейін оған "Ұлттық банктің қызметкері" ретінде Мальцев Алексей Владимирович деген басқа адам қоңырау шалған», - деп жазылған хабарламада.

Ол әйелге оның атына жалған несие берілгенін айтқан. Ер адамның әр сөзіне сенген әйел банктерден несие алуға тырысқан, бірақ банк беруден бас тартады. Содан кейін алаяқтар қаражатты үнемдеу үшін қолда бар тұрғын үйді сатуды ұсынады.

Әйел келісіп, жылжымайтын мүлік агенттігі арқылы пәтерді сатып, алынған ақшаны алаяқтар жіберген такси жүргізушісіне беріп жіберген.

15 миллион теңгені аударып жіберген

Жоғарыдағы жайтқа ұқсас тағы бір оқиға болды.

Әйел адамның ұялы телефонына 1414 ресми қызметінен хабарлама келіп түскен, содан кейін Ұлттық банктің қызметкері болып танысқан белгісіз адамнан қоңырау түскен.

«Банкир» оның атынан несие алуға тырысып жатқанын, өз қаржысын «құтқару» үшін нұсқауларды орындап, несие ресімдеп, барлық соманы — 15 миллион теңгеден астам қаржыны көрсетілген белгісіз шотқа аудару қажеттігін айтқан», - деп түсіндірді полиция департаменті.

Полиция азаматтарды қырағы болуға шақырды:

• Ешқашан бейтаныс адамдардың нұсқауы бойынша ақша аудармаңыз, олар кім болса да,
• Банктердің немесе мемлекеттік органдардың қызметкерлері қаражатты "қауіпсіз шоттарға" аударуды талап етпейді және мүлікті сатуды ұсынбайды,
• 1414-тен ресми хабарламалар-автоматты хабарламалар. Алаяқтар жалған нөмірлерді немесе тарату қызметтерін пайдалана алады.