Қарағандыда жүк көлігі мен жеңіл көлік соқтығысып, 25 жастағы жүргізуші қаза тапты
Жеңіл көліктің жолаушысы ауруханаға жеткізілді
Қарағанды қаласында 10 шілде күні сағат 10:30 шамасында жол-көлік оқиғасы болды. Апат Төлепов пен Жилстроевская көшелерінің қиылысында тіркелді, деп хабарлайды Azattyq Rýhy.
Жол бермеген жүк көлігі апатқа себеп болды
Алдын ала мәліметтерге сәйкес, Shacman маркалы жүк көлігінің жүргізушісі қосалқы жолмен келе жатып, басты жолда қозғалып келе жатқан Lada Granta автокөлігіне жол бермей, соқтығысқан.
Жүргізуші оқиға орнында қаза тапты
Қатты соққының салдарынан Lada Granta көлігінің 25 жастағы жүргізушісі оқиға орнында көз жұмды. Көліктегі жолаушы әртүрлі дене жарақатымен медициналық мекемеге жеткізілді.
Қылмыстық іс қозғалды
Аталған дерек бойынша Қылмыстық кодекс аясында іс қозғалды, тиісті сараптамалар тағайындалды.
Полиция ескерту жасады
Қарағанды облысының Полиция департаменті барлық жүргізушілерге жол қозғалысы ережелерін қатаң сақтау қажеттігін ескертеді.
