Жетісу облысында ер адам әйелін өлімші етіп, соққыға жыққаны туралы ақпарат тарады

Жетісу облысының Ақсу ауданындағы Баласаз ауылында ер адам өз әйелін өлімші етіп сабап, отбасылық зорлық-зомбылықтың ауыр салдарына себепкер болды. Қайғылы оқиға 22 маусымға қараған түні болған, деп хабарлайды Azattyq Rýhy.

Куәгерлер: әйелдің денесінде сау жер болмаған

«Криминальный Казахстан» Telegram-каналының мәліметіне жүгінсек, марқұмның әпкесінің айтуынша, 30 жастағы Айзатты күйеуі ұрып-соққаннан кейін әуелі әйелдің ата-анасының үйіне, содан соң аудандық ауруханаға апарған. Бірақ жергілікті аурухана жөндеу жұмысында болғандықтан, науқас Талдықорған қаласына жеткізілген. Өкінішке қарай, дәрігерлер оның көз жұмғанын ғана тіркеген.

Сот-медициналық сараптамасыз мәйіт берілген

Марқұмның туыстарының айтуынша, әйелдің денесінде көптеген көгерген іздер мен ашық жаралар болғанына қарамастан, мәйіт сот-медициналық сараптамасыз берілген.

«Біз мәйітті ешқандай құжатсыз алып кеттік. Денесінде сау жер қалған жоқ. Толықтай көгерген, жаралы. Бұл – тұрмыстық зорлық-зомбылықтың нақты көрінісі. Оны күйеуі өлтірді. Біз әділ тергеу жүргізіліп, кінәлі жауапқа тартылсын деп талап етеміз. Артында екі жасқа да толмаған бүлдіршіні мен ата-анасы аңырап қалды», – деді әпкесі.

Қылмыстық іс қозғалды, күдікті қамауға алынды

Аталған факті бойынша полиция қылмыстық іс қозғады. Күдікті ретінде ер адам ұсталып, уақытша ұстау изоляторына қамалды.