Жарақат алған қыз баланың жағдайы әзірге белгісіз
Алматы қаласының Әуезов ауданында 29 маусым күні таңғы сағат 7 шамасында жол-көлік оқиғасы болды. «Газель» маркалы автокөлік аялдама павильонына соғылып, ішінде тұрған бойжеткенді қағып кетті, деп хабарлайды Azattyq Rýhy.
Алматы қалалық полиция департаментінің мәліметінше, жүргізуші Шаляпин көшесімен батыс бағытта келе жатып, рульге ие бола алмай қалған.
«ГАЗ маркалы автокөліктің жүргізушісі Шаляпин көшесімен батысқа қарай қозғалып келе жатқанда, аялдама кешеніне соқтығысып, 2003 жылы туған жаяу жүргіншіні – аялдама ішінде тұрған бойжеткенді қағып кетті», – делінген полиция мәлімдемесінде.
Зардап шеккен қыз жедел түрде қаладағы ауруханалардың біріне жеткізілді. Оның жағдайы мен жарақаттарының сипаты туралы нақты мәлімет берілген жоқ.
Оқиғаға байланысты Әуезов аудандық полиция басқармасы тергеу жұмыстарын бастады. Қажетті сараптамалар тағайындалды. Жол апатының нақты себептері анықталып жатыр.