Спорт мектебінің құрылысы үшін Арнаулы мемлекеттік қордан 2,1 млрд теңге бөлінді
Ақмола облысының Зеренді ауылында жемқорлардан қайтарылған ақшаға балалар мен жасөспірімдерге арналған жаңа спорт мектебі ашылды, деп хабарлайды Azattyq Rýhy.
Спорт нысаны елге қайтарылған заңсыз иемденілген активтер қаражатының есебінен салынған. Жобаны жүзеге асыру үшін Арнаулы мемлекеттік қордан 2,1 млрд теңге бөлінді.
Жалпы ауданы 6 мың шаршы метрден асатын бұл спорт мектебі бір ауысымда 90-ға дейін бала мен жасөспірімді қабылдай алады.
Мекеме аясында шаңғы жарысы, күрес, бокс секциялары ашылған.
Бұл жастардың спортқа деген қызығушылығын арттырып, дене дайындығын шыңдауға мол мүмкіндік береді. Мектеп кең, жарық залдармен және заманауи жабдықтармен толық қамтылған.
Спорт мектебінің ашылу рәсіміне ҚР Бас прокуроры Берік Асылов, Ақмола облысының әкімі Марат Ахметжанов қатысты.
Айта кетейік, бұған дейін де қайтарылған активтер есебінен өңірде Алтынды, Арнасай, Жаңаесіл, Шалқар ауылдарында 4 медициналық мекеме салынған болатын.