Алматы облысында сақ дәуіріне жататын алтын әшекейлер табылды

Әл-Фараби атындағы Қазақ ұлттық университетінің археологиялық экспедициясы сақ дәуіріне жататын алтын бұйымдарды тапты, деп хабарлайды Azattyq Rýhy.

Қазба жұмыстары Алматы облысының Ұйғыр ауданына қарасты Тоғызбұлақ ауылының маңында жүргізілген. Зерттеу жұмыстына тарих факультетінің деканы, тарих ғылымдарының докторы, профессор Досбол Байғонақов жетекшілік еткен.

Тоғызбұлақ қорымдарынан 50-ге жуық қорған зерттелді

Экспедиция барысында археологтар Тоғызбұлақ-1 және Тоғызбұлақ-2 атты екі ірі қорымда зерттеу жүргізді.

• Тоғызбұлақ-1 – ауылдың оңтүстігінде орналасқан, 20-дан астам элиталық қорғаннан тұрады;
• Тоғызбұлақ-2 – ауылдың солтүстігінде, 30-дан астам қорғаннан құралған.

Қорғандардың көбі солтүстіктен оңтүстікке бағытталған және жүйелі түрде орналасқан, бұл олардың ерекше мәдени және әлеуметтік мәнін көрсетеді.

Алтын жүзік, тізбектер мен ерекше артефактілер табылды

Тоғызбұлақ-1 қорымындағы №3 және №4 қорғандардан ерекше құнды археологиялық олжалар табылды:

№4 қорғаннан ер мен әйел адамның сүйектері, сондай-ақ мынадай заттар табылды:

• керамикалық ыдыстар;
• темір құралдар;
• тас келсап;
• жануар сүйектері;
• алтын тізбектің сынығы;
• әртүрлі алтын пластиналар.

№3 қорғаннан адамның сүйек қалдықтары мен алтын пластиналар және сирек кездесетін арыстан бейнеленген алтын жүзік табылған. Бұл жүзік 8 грамм салмақпен жасалып, синкретизм элементтерін біріктіреді: бейнеде арыстанның тұмсығы мен жалынан бөлек, әйел жүзі, бұқа немесе қошқар бейнелері де байқалады.

Артефактілердің жасы – б.з.д. IV-III ғасырлар

Мамандардың айтуынша, табылған бұйымдар мен жерлеу рәсімі сақ тайпаларына тән. Бұл қорымдар ерте темір дәуіріне жатады. Табылған заттар Қазақстан аумағында сақ мәдениетінің кең таралғанын және осы ауданының сол дәуірде өркениет орталықтарының бірі болғанын дәлелдейді.

«Бұл – ұлттық тарих үшін аса маңызды жаңалық»

«Артефактілердің көркемдік деңгейі мен мазмұны – сақ дәуірінің дүниетанымын, діни сенімдерін, символикасын тануға мүмкіндік береді. Бұл табыстар – қазақ даласының бай мұрасының айқын дәлелі», – деді профессор Досбол Байғонақов.