Абай облысында «Rakhat0425» қаржы пирамидасы жұртты алдап, 790 млн теңге тапқан

ҚР Қаржы мониторингі агенттігінің (ҚМА) Абай облысы бойынша департаменті қаржы пирамидасының белгілері бар «Rakhat0425» деп аталатын ұйымның қызметін әшкерелеп, тоқтатты, деп хабарлайды Azattyq Rýhy.

Уәде етілген жалған инвестициялар мен 30% «дивиденд»

Ұйымдастырушылар азаматтарды сендіру үшін жалған инвестициялық жобаны алға тартып, мемлекеттік сатып алуға қатысы бар жобадан 30% дивиденд алуға уәде берген. Бұл схема арқылы 350-ден астам адамнан 790 миллион теңгеден аса қаражат жиналған.

Төмен бағамен пәтер алып, мүлікті «инвестицияға» айналдырған

Тергеу барысында күдіктілер азаматтарды пәтерлерін төмен бағамен беруге көндіргені анықталды. Кейін бұл пәтерлер үшінші тұлғалардың атына рәсімделіп, «инвестициялық жарна» ретінде бағаланған.

Үш күдіктіге қатысты бұлтартпау шарасы қабылданды

Қазіргі таңда:

• 2 күдікті қамауға алынды;
• 1 адамға үйқамақ түріндегі бұлтартпау шарасы қолданылды.

Тергеу құпиясы сақталады

ҚР Қылмыстық-процестік кодексінің (ҚПК) 201-бабына сәйкес, тергеудің өзге мәліметтері жария етілмейді.