Қазақстанның үш қаласында ауа сапасы нашарлайды

Метеорологтардың мәліметінше, 2 маусым күні еліміздің үш қаласында ауада ластаушы заттар жоғары деңгейде жинақталады, деп хабарлайды Azattyq Rýhy.

Бұл жағдай зиянды қоспалардың жер бетіне жақын ауа қабатында жиналып, таралмауына себеп болатын ауа райы факторларының үйлесуіне байланысты туындап отыр.

«2025 жылғы 2 маусымда Астана, Өскемен қалаларында және түнде Қостанай қаласында ауа сапасының нашарлауына әкелетін қолайсыз метеорологиялық жағдайлар күтіледі», – деп мәлімдеді «Қазгидромет» РМК.

Қолайсыз метеорологиялық жағдай деген не?

Қолайсыз метеорологиялық жағдайлар – бұл келесі ауа райы құбылыстары:

• Тымық ауа райы,
• әлсіз жел;
• тұман;
• температуралық инверсия.

Олар ластаушы заттардың таралуына кедергі келтіріп, жиналуына себеп болады. Бұл әсіресе тығыз салынған аудандарда немесе өнеркәсіптік аймақтарда ауа сапасының уақытша нашарлауына әкеледі.