Жамбыл облысында білім саласына бөлінген 25,5 млн теңге бюджет қаражаты жымқырылған

Жамбыл облысында жүргізілген тексеру нәтижесінде облыс прокуратурасы техникалық және кәсіптік білім беру саласында 25,5 млн теңге көлемінде қаражат жымқыру дерегін анықтады, деп хабарлайды Azattyq Rýhy.

Анықталған заңбұзушылық:

Жамбыл облысы әкімдігінің Білім басқармасына қарасты «Түзету мекемесі жанындағы №15 колледж» басшылығы оқуға қатыспаған сотталғандарды ресми түрде білім алды деп көрсетіп, үш жыл бойы заңсыз қаржыландыру алып келген.

2025 жылғы 5 ақпанда облыс прокуратурасы ҚР Қылмыстық кодексінің 189-бабы 4-бөлігінің 2) тармағы бойынша (сенiп тапсырылған бөтен мүлiктi иемденiп алу немесе талан-таражға салу) сотқа дейінгі тергеп-тексеру жұмыстарын бастады.

Тергеу Жамбыл облысы бойынша Экономикалық тергеп-тексеру департаментіне тапсырылды.

Қылмыстық-процестік кодекстің 201-бабына сәйкес, тергеу аяқталғанға дейін басқа мәліметтер жария етілмейді.