Қылмыскерлер ақша алып тұрған сәтінде ұсталды
Астанада төрт азамат кәмелетке толмаған баладан ақша бопсалады деген айыппен сотталды. Сот үкімімен олардың әрқайсысы 10 жылға бас бостандығынан айырылды, деп хабарлайды Azattyq Rýhy.
Сот материалдарына сәйкес, айыпталушылар жәбірленушінің шетелге оқуға баратынын және оның ата-анасында елеулі қаржы бар екенін біліп, сөз байласқан. Олар жасөспірімге психологиялық қысым көрсетіп, тіпті атыс қаруын көрсетіп, 20 млн теңге талап еткен. Осы әрекет нәтижесінде 4 млн теңге көлемінде ақша алған.
Топтың екі мүшесі жәбірленушіден қосымша 100 мың теңге алмақ болған кезде қолға түсті. Артынша қалған екі қылмыскер де құрықталды.
Мемлекеттік айыптаушының дәлелдерінен кейін сотталғандардың кінәсі толық дәлелденді. Үкіммен әрқайсысы 10 жылға бас бостандығынан айырылды. Сонымен қатар, жәбірленушіге келтірілген 4 млн теңге материалдық шығын толығымен өтеліп, моральдық зиян ретінде 2 млн теңге көлемінде өтемақы да өндірілді.
Қазақстан Республикасы Қылмыстық кодексінің 194-бабына сәйкес, қорқытып алу қылмысы үшін 15 жылға дейін бас бостандығынан айыру жазасы қарастырылған. Бұл бап бойынша кей жағдайларда қылмыстық жауапкершілік 14 жастан басталады. Ал егер көрсетілген жасқа жетпеген адам осындай әрекет жасаса, оның орнына ата-анасы немесе заңды өкілдері жауап береді.
Елорда прокуратурасы кәмелетке толмағандардың құқықтары мен заңды мүдделерін қорғауға ерекше назар аударады және мұндай істердің алдын алу үшін тиісті шаралар қабылданып отыратынын атап өтті.