Қызылордада «Miras» республикалық кеңесінің көшпелі отырысы өтті
«AMANAT» партиясының сайлауалды бағдарламасы аясында 2023–2025 жылдары өңірде 12 мәдениет нысанын салу және 45 нысанға жөндеу жұмыстарын жүргізу жоспарланған

Қызылорда қаласында «AMANAT» партиясы жанындағы Азаматтық қоғам мен мәдениетті дамыту жөніндегі «Miras» республикалық кеңесінің көшпелі отырысы өтті. Жиында партияның 2023–2027 жылдарға арналған «Халықпен бірге!» сайлауалдыбағдарламасы аясында Сыр өңірінде мәдени нысандарды салу және жөндеу жұмыстарының жүзеге асу барысы мен аймақтағы мәдениет саласының өзекті мәселелері талқыланды, деп хабарлайды Azattyq Rýhy.
Алқалы жиынды партияның облыстық филиалы жанындағы «Miras» аймақтық кеңесінің төрағасы Баймырза Қожамберлиев ашып, өңірлік кеңестің атқарып жатқан жұмыстарын баяндады.
Қызылорда облыстық Мәдениет, архивтер және құжаттама басқармасының басшысы Жанмұрат Сейіловтің мәлімдеуінше, «AMANAT» партиясының сайлауалды бағдарламасы аясында 2023–2025 жылдары өңірде 12 мәдениет нысанын салу және 45 нысанға жөндеу жұмыстарын жүргізу жоспарланған.
Кеңес төрағасы, ҚР Парламенті Мәжілісіндегі «AMANAT» партиясы фракциясының мүшесі Аманжол Әлтай Сыр өңіріндегі «Miras» аймақтық кеңесінің белсенді жұмысын ерекше атап өтті. Сонымен қатар партия бағдарламасының аясында мәдениет нысандарын салу көрсеткішінің жоғары екеніне тоқталды.
«Сыр елі – жыр елі» атанған бұл өлке – дауылпаз сүлейлер мен тума таланттардың мекені. Ұлт рухының алтын өзегі осы өңірде қалыптасқан. Осындай қасиетті аймақта мәдениетке қолдау көрсетілмеуі мүмкін емес. Партиямыздың сайлауалды бағдарламасы шеңберінде жоспарланған жұмыстар кезең-кезеңімен орындалып жатыр. Сонымен қатар жоспардан тыс «Анаға тағзым», «Отбасы орталығы», «Өнер орталығы», «Шығармашылық академиясы» секілді бірқатар жаңа нысандар бой көтерді. Жаңа симфониялық оркестр, инклюзивтітеатр, жастар театры, заманауи би және хор ұжымдары құрылды. «Жыраулар үйі» ашылып, барлық аудандарда «Руханият орталықтары» салынды. Бұл – өңірдегі бірлік пен жүйелі жұмыстың нәтижесі», – деді Аманжол Әлтай.
Сонымен қатар кеңес төрағасы мемлекет басшысы Қасым-Жомарт Тоқаевтың «Кітапхана – мемлекеттің, ұлттың негізгі жады» деген қағидасына тоқталып, кітап оқитын ұлт қалыптастырудағы маңызды мәселелерді көтерді. Мәселен, Қызылорда қаласындағы А.С.Пушкин атындағы орталық кітапхана мен №13 балалар кітапханасының орналасқан орны білім алушылар үшін ыңғайсыздық туғызып отырғаны жөнінде азаматтардан ұсыныс түскенін айтып, бұл мәселені реттеуді ұсынды.
Кеңес отырысын қорытындылаған облыс әкімінің орынбасары Шахмардан Байманов Сыр өңірінің мәдениет пен өнер саласында атқарып жатқан жұмыстарын атап өтіп, облыс әкімдігі тарапынан партия бастамаларына әрдайым қолдау көрсетілетінін айтты.