Абай облысында 100-ден астам мектеп ұстазының құқығы бұзылған

Абай ауданының прокуратурасы жүргізген тексеру барысында 11 мектептен заңбұзушылықтар анықталды. 125 қызметкердің еңбек құқығы бұзылғаны белгілі болды, деп хабарлайды Azattyq Rýhy.

Мұғалімдер қорғаныс құралдарынсыз жұмыс істеген

Тексеру нәтижесінде мектептерде педагогикалық және техникалық қызметкерлерге қажетті жеке қорғаныс құралдары берілмегені анықталды. Атап айтқанда:

• Химия пәні мұғалімдеріне – ақ халаттар;
• Информатика пәні мұғалімдеріне – көзді қорғауға арналған арнайы көзілдіріктер;
• Зертханашыларға — қолғаптар мен қорғаныс алжапқыштар.

Конституциялық құқықтар шектелген

Бұл жағдайлар қызметкерлердің қауіпсіз және гигиеналық еңбек ету құқығын бұзып, заңмен белгіленген еңбек жағдайларына қайшы келіп отыр.

Жауаптылар жазаланды

Прокуратураның араласуынан кейін мектеп директорлары тәртіптік жауапкершілікке тартылды. Қазіргі таңда мектептер қажетті қорғаныс құралдарын сатып алу процедураларын бастап кетті.